ഗംഗോത്രി..

യാത്ര പോകണം കുടജാദ്രി
മുതൽ ഗാംഗോത്രി വരെ നീളണം
കൂട്ടിനു നിന്നെ പോലൊരുവൾ വേണം
നിന്നെ പോലൊരുവൾ വേണ്ട നീ മതി.

വളയം പിടിക്കാനും, മത്ത് പിടിപ്പിക്കാനും
കഴിയുന്ന പെണ്ണ് അത് നീ തന്നെ.
ശരാവതിയിൽ നീ ഈറനഴിച്ചു കയറും
വരെ കണ്ണടച്ച് കാവൽ നിൽക്കാം

പെണ്ണേ, ഹംപിയിലേക്ക് പോകാം
അവശിഷ്ട നഗരിയും കണ്ട്,
അജന്തയിലും എല്ലോറയിലും ചെല്ലാം,
എങ്ങും വരകളും, ചിത്രങ്ങളും.

സ്മൃതിഭ്രംശം ഭാവിച്ചിരുന്നില്ലേൽ
തിരിച്ചറിയുമായിരുന്നു നമ്മുടെയും
ഗുഹാ സൃഷ്ടികളേ, നേരമിരിട്ടി
ഇന്നത്തെ ഉറക്കമിവിടെ തന്നെ

മുമ്പത്തെ പോലെയെന്നാൽ
പുണർന്നല്ലതാനും

നമുക്ക് ഈ ഭൂമിയിൽ വട്ടം
വരയ്ക്കാം, കിഴക്കോട്ടു നീങ്ങാം..
അരുണോദയന്റെ നാട്ടിൽ, പുരിയുടെ
തീരങ്ങളിൽ നനഞ്ഞു ചേരാം..
അസ്തമയ സൂര്യനെ കണ്ടു മയങ്ങാം.

എഴുന്നേൽക്കാം, സിദ്ധാർത്ഥനരികി
ലേക്ക് പോകാം ബോധിയുടെ താഴെ
നീയും ചെന്നിരുന്നു കൊൾക മുജ്ജ്ന്മ
മുഖമേതെങ്കിലും ചിന്തയിൽ വന്നെങ്കിലോ

ത്രിവേണിയെത്തി ഹിമപുത്രിമാലിന്യവാഹി- യായി
കളങ്കിതിയാവുന്നതിവിടല്ലോ ഇന്നിനി ഈ
ക്ഷേത്രത്തിൽ നീ കഴിയെ ഞാനൊന്ന്
ചുറ്റിക്കറങ്ങി പുലരുമ്പോളെത്താം

ആഘോരിയുടെ നഗരം, ചുടല സംഗമ നാഥന്റെയിടം,
ചിലം നിറച്ചു തന്നതിന് നന്ദി.
ഈ നിശയിൽ ചെമ്പഴുക്ക നിറമാർന്നൊരെൻ
കരളിനെ കറുപ്പിച്ചെടുക്കണം.

പുകചുരുളുകളാലെൻ തലച്ചോറ് കനക്കട്ടെ,
ഓർമയിൽ നീ മാത്രം തങ്ങീടട്ടെ,
ഓർമയിൽ നീ മാത്രം....

By - അനൂപ് കണ്ണാടി